BUKANA E MABPI LE KAROLO YA 14 YA KGOTHALETSO YA BOKGONI BA PHIHLELO YA LESEDI, MOLAO WA 2 WA 2000
Selelekela
Ka ho ya ka Karolo ya 14 ya Molao wa Kgothaletso ya Phihlelo ya Lesedi wa 2 wa 2000, mohlanka wa tlhahisoleseding wa mokga wa mmuso o lokela ho ngola ka bonyane dipuo tse tharo tsa semmuso bukana e nang le dintlha tse itseng tse ikgethang.
Khansele ya Babokelli ba Dikoloto e fumana matla a yona Molaong wa Pokello ya Dikoloto, Molao wa 114 wa 1998. Khansele ya Babokelli ba Dikoloto ke mokga wa mmuso jwalo ka ha ho lohothwa temaneng ya (b)(ii) ya tlhaloso ya ?mokga wa mmuso?; e leng mokga o sebedisang matla a mmuso ho phetha mosebetsi wa mmuso ka ho latela molao. Ka hoo Khansele ya Babokelli ba Dikoloto e laola phihlelo ya direkoto tsa yona.
Dintlha tsa bao o ka iteanyang le bona
Molaodi wa Phethahatso wa Khansele ke yena mohlanka wa tlhahisoleseding wa Khansele.
Diofisi tsa Khansele ya Babokelli ba Dikoloto di sebakeng sena -
Aterese ya poso ke ena e latelang:
Silverton, 0127
Thelefounu: 8049808
Dihora tsa ho sebetsa: 07h30-16h00
Tataiso ya ka moo o ka sebedisang molao wa 2 wa kgothaletso ya phihlelo ya lesedi wa 2000
Ka ho ka Karolo ya 10 ya Molao wa 2 wa Kgothaletso ya Phihlelo ya Lesedi wa 2000, Khomishene ya Ditokelo tsa botho e lokela ngola ka puo e nngwe le e nngwe ya semmuso tataiso e nang le lesedi le jwalo, ka tsela le mokgwa oo ho leng bonolo ho e utlwisisa, jwalo ka ha ho ka hlokwa ke motho ya ratang ho sebedisa tokelo efe kapa efe e lohothwang Molaong ona.
Dintlha tsa Ntlokgolo ya Khomishene ya Ditokelo tsa botho ke tsena tse latelang:
Johannesburg
Thelefounu: 484-8300
Sebopeho le mesebetsi ya Khansele ya Babokelli ba Dikoloto
Ho hlongwa ha Khansele ya Babokelli ba Dikoloto
Khansele ya Babokelli ba Dikoloto e hlonngwe ka Molao wa 114 wa Pokello ya Dikoloto wa 1998. Ho ile ha kengwa tshebetsong Molao le Melawana ho tloha ka la 7 Hlakola 2003.
Sepheo sa Khansele ya Babokelli ba Dikoloto
Khansele ena e tla nkuwa jwalo ka motho ka ho ya ka molao. Maikemisetso a Khansele a beuwe ka mokgwa o latelang Karolong ya 2 ya Molao:
Ho ngodisa babokelli ba dikoloto le ho ba le taolo hodima mosebetsi wa babokelli ba dikoloto, ho kenyelletswa:
a. ho boloka rejistara ya mabitso ya mmokelli e mong le e mong wa dikoloto eo kopo ya hae ya ho ngodiswa e ananetsweng kapa eo ngodiso ya hae e hannweng kapa e sa ananelwang;
b. ho bokella ditefello tsa ngodiso le ditefello tsa botho tsa selemo le selemo;
c. kamohelo ya khoutu ya boitshwaro e phatlaladitsweng Koranteng ya mmuso ka Hlakola 2003;
d. ho fuputsa ka menyenyetsi ya boitshwaro bo sa lokang kgahlanong le mmokelli wa dikoloto;
e. ho nka mehato ya kgalemo nqeng tse loketseng mme ha motho a fumanwa a le molato ho be le kotlo e le nngwe kapa tse ngata tse beuweng Karolong ya 15 ya Molao. Mamelo tsa dinyewe di buletswe setjhaba.
Ka bokgutshwanyane Khansele ya Babokelli ba Dikoloto ke mokga o hlonngweng ka ho ya ka molao oo sepheo sa ona ka kakaretso e leng ho fetola mokgwatshebetso wa pokello ya dikoloto mona Afrika Borwa ka ho beha leihlo tshebetso le boprofeshenale ba babokelli ba dikoloto le ho ntshetsa pele moya wa taolo e ntle bakeng sa ho sireletsa setjhaba ka bophara ekasitana le bakolotiwa. Molao hape o kenya molaong pokello ya tefello kapa moputso ke babokelli ba ngodisitsweng ba dikoloto. Ho tloha ka la 11 Phato 2003 ha ho na motho ya tla sebetsa jwalo ka mmokelli wa dikoloto ha a sa ngodisa le Khansele. Ha motho a ka sebetsa a sa ingodisa moo o tla be a tlotse molao.
Sebopeho sa Khansele ya Babokelli ba Dikoloto
Ditho tsa Khansele ya Babokelli ba Dikoloto di kgethwa ke Letona la Toka mme e tla ba ditho tse seng ka hodimo ho tse 10.
Ka ho ya ka Karolo ya 3 ya Molao, Khansele e bopilwe ka mokgwa o latelang:
a. motho ofe kapa ofe ya tshwanelehang hape ya nepahetseng ya nang le bonabo ba tsebo le boiphihlelo bo tshwanelehileng tsamaisong ya ditaba tsa baahi, eo e leng Modulasetulo;
b. bao e leng ditho ?
makgistarata leqwetha le kgethuweng ke mokga kapa mekga ya boemedi;
bonyane ba babedi empa ba sa fete ba bane, babokelli ba dikoloto, ba babedi ba bona ba tla kgethwa ka mora ditherisano le mekgatlo e emetseng babokelli ba dikoloto, bao e leng batho ka tlhaho mme ba sebeditseng mosebetsi wa ho bokella dikoloto bonyane dilemo tse tharo;
batho ba babedi, bao ka ho ya ka maikutlo a Letona ba tshwanelehang ho ba Khanseleng;
motho ya mong ho tswa mabitsong a thontsweng ke diinstitjhusheneng tse emetseng ditabatabelo tsa basebedisi, mme bao, ka ho ya ka maikutlo a Letona ba tshwanelehang ho ba Khanseleng.
Dikomiti
Karolo ya 5 ya Molao e hlophisetsa ho kgethwa ha ditho tse tharo tsa Khansele ho ba Komiti ya yona ya Phethahatso bakeng sa dikopano tse pakeng tsa Khansele hore di phethe matla le mesebetsi yohle ya Khansele, ha feela bongata ba ditho e tla ba ditho Khansele tseo e seng tse kgethuweng maemong a tsona jwalo ka babokelli ba dikoloto. Komiti ya Phethahatso ha e na matla a ho qhella thoko kapa ho fetola qeto ya Khansele kapa ho hula setifikeiti kapa ngodiso. Ketso efe kapa efe e entsweng kapa qeto e nkuweng ke komiti ya Phethahatso e tla sebetsa ha feela e ke ken ya fetolwa kapa ya qhellwa thoko ke Khansele.
Komiti ya Kgalemo
Ka ho ya ka Molawana wa 7 wa Melawana e phatlaladitsweng Koranteng ya mmuso, No. 24351 ya la 7 Hlakola 2003, Khansele e ka:
a. hloma komiti kapa dikomiti, tse nang le bonyane ditho tse tharo tsa Khansele, eo se le seng sa tsona e lokelang ho ba motho ya nang le mangolo a tshwanelehileng a molao, e be e kgetha e mong wa ditho tseo ho ba modulasetulo wa komiti; kapa b. kgetha motho kapa batho, ha ho hlokeha, ho fuputsa ka menyenyetsi efe kapa efe ya tsamaiso e sa lokang jwalo ka ha ho hlophisitswe mona molawaneng ona.
Ditjhelete
Khansele e iketsetsa ditjhelete tseo e leng tsa yona ka ngodiso le ka ditefello tsa selemo le selemo tse leshwang ke batho ba kopang ho ngodiswa le babokelli ba ngodisitsweng ba dikoloto.
Ka ho ya ka Karolo ya 1220 ya Molao, Khansele e tla boloka rejistara , e leng rejistara e tla:
a. phatlalatswa Koranteng ya mmuso selemo le selemo;
b. ntjhafatswa kgweding e nngwe le e nngwe ya bobedi ke Khansele;
c. fumaneha ho lekolwa ke setjhaba diofising tsa Khansele ya Babokelli ba Dikoloto;
d. romelwa Palamenteng matsatsing a 14 ka mora ho phatlalatswa Koranteng ya Mmuso.
Khansele hape e boloka rejistara ya dikhomputara tsa yona, tseo setjhaba se nang le bokgoni ba ho di fihlela.
Nako le nako, le ha ho hlokeha, Khansele e tla ntsha ditaba tse yang dikoranteng.
Direkoto tsa Khansele ya Babokelli ba Dikoloto
Direkoto tsohle tsa Khansele di bolokwa diofising tsa Khansele.
Khansele e boloka direkoto tse latelang:
a. rekoto ya dikopo tsohle tse fumanweng ho tswa ho babokelli ba dikoloto bakeng sa ho ingodisa le Khansele;
b. rekoto ya dikopo tsohle tse ananetsweng;
c. rekoto ya dikopo tsohle tse hannweng;
d. rekoto ya ditletlebo tsohle tse fumanweng ho tswa ho ditho tsa setjhaba le babokelli ba dikoloto le tsa dimamelo tsa kgalemo tse tshwerweng;
e. rekoto tsa dipotso tsohle tse fumanweng ho tswa ho ditho tsa setjhaba le babokelli ba dikoloto;
f. metsotso yohle le mananetaba a dikopano tsa Khansele le a Komiti ya Phethahatso;
g. direkoto tsa ditjhelete tsa Khansele;
h. direkoto tse fapaneng tsa tsamaiso.
Direkoto tse latelang di fumaneha feela-feela ntle le bothata bakeng sa basebeletsi mme di lokelwa ho kotjwa ka ho ya ka Karolo ya 18 ya Molao wa 2 wa 2000:
a. Direkoto tsa motho ka seqo di ka fuwa mosebetsi eo e leng faele ya haeo eo;
b. Direkoto tsa mamelo tsa kgalemo le ditaba tse amanang le hoo di ka fumanwa ke mosebeletsi eo ya amehang;
c. Khoutu ya Boitshwaro ya Khansele e sebediswang ho basebeletsi e ka fumanwa ke basebeletsi bohle.
Direkoto tse latelang di ka fumanwa ke setjhaba le basebeletsi bohle ntle le bothata, mme di lokelwa ho kotjwa ka ho latela mokgwatshebetso o beuweng Karolong ya 18 ya Molao wa 2 wa 2000:
a. Hlahlobo ya rejistara ya babokelli ba dikoloto ba ngodisitsweng diofising tsa Khansele kapa ho fumana tlhahisoleseding e ka hara rejistara ka thelefounu, e-mail, poso le/kapa fekse;
b. Ha motho a ka kopa khopi ya rejistara kapa karolo ya yona, yona e ka fumanwa ka mora ho lefa tefello e beuweng bakeng sa hoo.
Direkoto tse ding tsohle ha di fumanehe feela-feela bakeng sa setjhaba ntle le kopo ka ho latela Karolo ya 18 ya Molao wa 2 wa 2000.
Ka ho ya ka Molawana wa 7 wa Melawana ya tshebetso setho sa setjhaba, kapa mmokelli wa dikoloto, ka kenya tletlebo Khanseleng kgahlanong le mmokelli wa dikoloto ya ngodisitsweng.
Tletlebo e lokela ho ba ka mokgwa ona o latelang:
a. Ho tshwanetse hore e be afidaviti e nang le dintlha tsena tse latelang:
histori e kgutshwane ya taba;
dintlha tse mabapi le taba e itseng eo motletleba a tletlebang ka yona;
dintla tsa mmokelli wa dikoloto ka botlalo;
ditatamente ka dipaki dife kapa dife, ha di le teng;
ditokomane tse tiisetsang, ha di le teng;
Khansele e tla tsebisa Mmokelli wa Dikoloto ka menyenyetsi eo. Mmokelli wa Dikoloto e be o ba le matsatsi a 5 a ho arabela ditletlebo tseo. Khansele e tla be e se e lekola monyenyetsi mmoho le karabelo ya ona, e be e sebetsana le ona ka tsela e tshwanetseng, e ka kenyelletsang le ho qosa Mmokelli wa Dikoloto ka boitshwaro bo sa lokang.
Ha Mmokelli wa Dikoloto a ka fumanwa a le molato, ka ho ya ka Karolo ya 15 ya Molao, yena a ka fuwa kotlo e latelang:
a. ho ka hulwa ngodiso ya hae jwalo ka mmokelli wa dikoloto;
b. ho ka emiswa ngodiso ya hae bakeng sa nako e itseng kapa ho fihlela a phethahatsa boemo kapa maemo a itseng;
c. a ka lefiswa faene e sa feteng palo e beuweng, mme faene eo e tla lokelwa ho leshwa ho Khansele;
d. a ka sutjwa ka monwana;
e. ho ka batlwa ho tswa yena ditjeo tsohle tse fihletsweng ke Khansele mabapi le dipatlisiso;
f. a ka laelwa ho busetsa motho ofe kapa ofe eo Khansele e dumelang hore ha a tshwarwa hantle ke tsamaiso ya mmokelli eo wa dikoloto mme a bontshe Khansele nakong e itseng e tla behwa bopaki ba pusetso eo; kapa g. ho ka kopangwa efe kapa efe ya dikotlo tsena tse ka hodimo.
Hodima moo Khansele e etsa hore setjhaba se kgone ho fumana ya Babokelli ba Dikoloto ba ngodisitsweng, mme yona e diofising tsa Khansele. Setjhaba kapa babokelli ba dikoloto hape ba ka etsa dipatlisiso ka thelefounu ba batla ho tseba boemo ba mmokelli ya itseng wa dikoloto.
Le ha ho le jwalo, Khansele ha e fane ka dikeletso tsa molao ka kakaretso kapa hona ho thusa setjhaba ka mathata a tsa molao a amanang le tefello ya dikoloto.
Leano la Khansele
Leano la Khansele le behwa ke Khansele. Le ha ho le jwalo, Babokelli ba Dikoloto le setjhaba ba dumelletswe ho ka fana ka ditshisinyo.
Dikopano le metsotso ya dikopano
Ka ho ya ka Karolo ya 4 ya Molao Khansele e tla kopana kgetlo la pele nakong le sebakeng se tla behwa ke moduasetulo mme ka mora moo bonyane hararo selemong se seng le se seng sa ditjhelete sebakeng le ka nako e tla behwa ke modulasetulo, kapa ha a le siyo, hoo o tla etswa ke motlatsi wa modulasetulo.
Khoramo (palo e amohelehileng ya hore kopano e ka tswela pele) bakeng sa kopano ya Khansele e tla botjwa ke bongata ba ditho tsa yona.
Metsotso e nepahetseng ya dikopano tsa Khansele ekasitana le ya dikopano tsa Komiti ya Phethahatso e tla bolokwa diofising tsa Khansele ya Khansele ya Babokelli ba Dikoloto
